జాగృతి – సంపాదకీయం
శాలివాహన 1941 శ్రీ శార్వరి శ్రావణ శుద్ధ సప్తమి – 27 జూలై 2020, సోమవారం
అసతో మా సద్గమయ తమసో మా జ్యోతిర్గమయ మృత్యోర్మా అమృతంగమయ – బృహదారణ్యకోపనిషత్‌
సామాన్యుల నుండి సెలబ్రిటీల దాకా, ప్రభుత్వ అధికారుల నుండి మంత్రుల దాకా, ప్రజా రాజకీయ నాయకుల నుండి విప్లవకారుల వరకూ వారు వీరు అనే తేడా లేకుండా అందరికీ కరోనా తన కోరల రుచి చూపింది. రాణివాసాల్లాంటి అతఃపురాల్లో నివసించే అందాల సుదరీమణులకు, సామాన్యులు సమీపించడానికి కూడా సాహసించని రక్షణ వలయాల నడుమ రాజభోగాలు అనుభవించే మంత్రులు, ప్రభుత్వ అధికారులు, కట్టుదిట్టమైన జైలుగోడల మధ్య భద్రంగా బ్రతుకుతున్న విప్లవకవికి సైతం సోకి కరోనా సత్తా చాటింది. తను చేరుకున్న అందరినీ సమదృష్టితో భయపెట్టి, బాధించగలిగింది.
పోలీసు లాఠీలకు, తుపాకి తూటాలకు బెదర బోదని గప్పాలు కొట్టిన విప్లవ కవి గుండె కరోనా దెబ్బకు విలవిల్లాడక తప్పలేదు. కరోనా సోకిన వేళ మానవతా దృక్పథంతో ఆయన్ను జైలు నుంచి విడుదల చేయాలని అర్జీలతో, పత్రికా ప్రకటనలతో ప్రభుత్వాన్ని దీనంగా అర్థిస్తున్న వారికి ఆయన ధైర్యం చెప్పలేకపోతున్నారు. నిర్బంధాలు విప్లవాన్ని నిరోధించలేవని ఆలపిచినంత ధీమాగా కరోనా కాటుకు విప్లవ కారులు బెదరబోరని నొక్కి వక్కాణించలేక పోతున్నారు.
కరోనా మహమ్మారికి సంబంధిచిన సమాచారం పూర్తిగా నమ్మదగినంతగా రావడం లేదన్న విమర్శలు కోకొల్లలు. మీడియా వార్తలు, వార్తా కథనాలు రాజకీయ రాగద్వేషాల కంపునూ మోసుకు వస్తున్నాయి. కరోనా వార్తలు వ్యాధిని మిచి భయపెడుతున్నాయన్న విమర్శల్లో నిజం లేకపోలేదు.
తెలంగాణలో ప్రభుత్వ ఆసుపత్రుల్లో చాలా బెడ్లు ఖాళీగా ఉన్నాయని ప్రభుత్వం చెపుతోంది. ఆంధప్రదేశ్‌లోబెడ్‌దొరకనంతగా ఆసుపత్రులన్నీ కిటకిట లాడుతున్నాయట! ఎవర్ని నమ్మాలో ఎవర్ని చూసి ధైర్యం తెచ్చుకోవాలో తోచక ప్రజలు తికమక పడుతున్నారు. కరోనాను కట్టడి చేయగలదని ఊరిస్తున్న వ్యాక్సిన్‌ ఎప్పటికి, ఎలా వస్తుందో తెలీడం లేదు. వ్యాక్సిన్‌ సామాన్యులకు చౌకగా చేరువ కాగలదో లేక అలవాటు ప్రకారం కార్పొరేట్‌ శక్తుల పంట పండిస్తుందో తేలడం లేదు. అటు ప్రపంచవ్యాప్తంగా, ఇటు దేశంలో వివిధ రాష్ట్రాల నుండి వస్తున్న సమాచారాన్ని క్రోడీకరించి మేలైన మార్గాన్ని సూచించాలని తపన పడుతున్న విశ్లేషకులకు, మేధావులకు సైతం ఓదారి దొరకడం లేదనడం అతిశయోక్తి కాదు. ఈ విపత్కర పరిస్థితుల్లో కారుచీకటిలో కాంతిరేఖలా కేరళ సమాచారం గోచరిస్తోంది. కరోనా సోకిన వారి సంఖ్యలోను, మరణాల సంఖ్యలోను మిగతా రాష్ట్రాలతో పోల్చితే తక్కువగా ఉన్న కేరళ అనుసరించదగిన ఆశావహ పరిస్థితుల నెలవుగా తోస్తున్నది.
ఢిల్లీ, హైదరాబాదు, ముంబాయి లాంటి మహా నగరాల్లో మాదిరి సూపర్‌ స్పెషాలిటీ అని పేరు మోసిన అల్లోపతి ఘనాపాటీ ఆసుపత్రులు కేరళలో పెద్దగా లేవు. రాష్ట్రం అంతటా పెద్ద సంఖ్యలో నెలకొని, చురుగ్గా నడుస్తున్న ప్రాధమిక ఆరోగ్యకేంద్రాలు మాత్రం అడుగడుగునా దర్శన మిస్తాయి. ప్రాధమిక ఆరోగ్య కేంద్రాల నుండి పట్టణాల్లోని పెద్ద ఆసుపత్రులదాకా అవి ప్రభుత్వానివైనా, ప్రయివేటువైనా అన్నిచోట్లా సాంప్రదాయ కేరళీయ వైద్యవిదానానికే పెద్ద పీట. కేరళలో అడుగడుగునా నెలకొని ఏళ్ల తరబడి నడుస్తూన్న ప్రాథమిక ఆరోగ్యకేంద్రాలు, కేరళీయ సాంప్రదాయ వైద్యమే కేరళీయులను కరోనా బారినుండి చాలావరకు కాపాడిందన్న వ్యాఖ్యలు సత్యదూరం కాదు.
ఇటు తెలుగునాట, అటు పొరుగునే ఉన్న తమిళనాట ప్రాథమిక ఆరోగ్య కేంద్రాలు వాసిలోను, రాశిలోను కేరళతో పోల్చితే తక్కువే అని ఒప్పుకుతీరాలి. స్వాతంత్య్రం వచ్చిన పిదప ఏర్పడిన ప్రజా ప్రభుత్వాలు విదేశీ వ్యామోహంతో సాంప్రదాయిక ఆయుర్వేద వైద్యాన్ని నిర్లక్ష్యం చేయడమే కాక, పల్లె ప్రజలకు సైతం వైద్యసేవలు అందిచడానికి తగినన్ని ప్రాథమిక ఆరోగ్య కేంద్రాలను నెలకొల్పి నిర్వహించడంలో విఫలం కావడం విషాదం. ‘మీ అమ్మకు జలుబైతే అపోలో మా అమ్మకు క్యాన్సరైతె ఆకుపసరా!’ అన్న సినీకవి రాతల వాతలకు స్పందించిన రాజకీయులు తెలుగు నాట అందరికీ అపోలో సౌకర్యం కల్పన పేరుతో పేదల ఓట్లు కొల్లగొట్టే అడ్డదారిని ఎంచుకున్నారు. గత పాలకుల ఈ తప్పిదాలే ఇటు తెలుగునాట, అటు తమిళనాట ప్రజలు పెద్దసంఖ్యలో కరోనా కాటుకు బలికావడానికి కారణమనే నిర్ధారణ నిర్హేతుకం కాదు. ఉభయ తెలుగు రాష్ట్రాల్లోను ప్రాధమిక ఆరోగ్య కేంద్రాల సంఖ్యను, సమర్థతను పెంచి అందరికీ మెరుగైన వైద్యం అందించాలనే ఆలోచనే చేయలేదన్నది ఓ నిష్ఠుర సత్యం. కమీషన్ల కోసం కక్కుర్తిపడి ప్రజా ధనాన్ని కార్పొరేట్‌ ఆసుపత్రులకు దోచిపెట్టే ఎత్తుగడలకు తెలుగు పాలకులు పాల్పడడం తాజా రాజకీయ వంచనకు నిదర్శనం. ఓట్లవేటలో స్వదేశీయతను విడనాడి విదేశీ బాట పట్టిన స్వార్థ రాజకీయ జీవులను స్వదేశీ బాట పట్టించడానికి కేరళ అనుభవాలు తెలుగు ప్రజలకు దారిదీపం కావాలి. స్వదేశీ స్ఫూర్తితో అందరికీ మెరుగైన వైద్యం చౌకగా అందించే దిశగా ప్రభుత్వ విధానాలు మారాలి. ప్రజారోగ్య విధానాల మార్పు కోసం ప్రజలు పాలకులపై ఒత్తిడి పెంచాలి. మారడానికి సిద్ధపడని పాలకులను మార్చి ప్రజలు రాజకీయాలకు అతీతంగా లక్ష్య సాధన కోసం పోరాడాలి!
About Author
